قومی اور بین الاقوامی سطح پر منعقدہ علمی اولمپیاڈ‌ز میں میڈل حاصل کرنے والے ایران کی رضاکار فورس بسیج کے طلبہ و طالبات کے ایک گروپ نے اتوار کے روز رہبر انقلاب اسلامی آیت اللہ العظمی سید علی خامنہ ای سے ملاقات کی۔ یہ ملاقات رہبر انقلاب اسلامی کی اقتدا میں نماز ظہرین ادا کئے جانے کے بعد انجام پائی۔ علمی اولمپیاڈز میں میڈل حاصل کرنے والوں نے اپنے بائیس میڈل رہبر انقلاب اسلامی کو پیش کئے۔ یہ میڈل ان طلبہ و طالبات نے ریاضی، فزکس اور کمپیوٹر کے مضامین میں حاصل کئے تھے۔ اس مختصر سی ملاقات میں رہبر انقلاب اسلامی نے علمی اولمپیاڈز میں ایرانی طلبہ و طالبات کی اچھی پوزیشنوں کو فرزندان انقلاب کی علمی صلاحیتوں اور پیشرفت کی علامت قرار دیا اور فرمایا کہ انہی علامتوں اور اسی ترقی و پیشرفت سے ایران کی اندرونی قدرت و طاقت میں اضافہ ہوتا ہے۔